POVIRA GENTI!!

Povira genti, chi cundanna brutta,
ittata ddha, ammenz’a so’ llordìa,
c’a fami chi si tocca, ‘a bucca ‘sciutta,
chi campa pi’ scummissa e fantasia;

povira genti, poviri figghioli,
ch’i testi cumbinati a piricuddhi,
cu’ scarpi senza tacchi e senza soli
e niri, biscottati com’e ‘nzuddhi!!

Scuri su’ iddhi e tutt’u mundu è scuru,
sul’a llordìa ‘i faci un pocu ianchi,
supr’a ‘sta terra vannu muru muru,
poviri figghioleddhi, vecchi e stanchi!!

Ch’i panzi sempr’all’aria, maricchieddhi,
cull’occhi chi ti tagghin’i bureddha,
peggiu r’i cani, mari ‘nnucenteddhi
e niri, comu tartir’i pareddha;

ch’i bambuleddhi fatt’i pezza e fangu,
‘a scaza, ‘a nura, mari criaturi,
menthri r’i peri già nci scula sangu,
iocunu, mi cunfundun’i duluri……..

…….E i ‘randi:Mammi, pathri, nonniceddhi,
cull’occhi spalancati ‘nfacc’e stiddhi,
ch’i mani sthritti sthritti, maricchieddhi,
pregunu un Cristu Niru….Com’a iddhi!!!!!!!!!!!

(poesie tratte dalla raccolta intitolata “Chiuviva finu finu”)