L’ARTI

Nuddhu ti senti, quando parri ‘r’arti,
non si poti campari ammenz’e storti,
‘stu vecchiu ciriveddhu si ndi parti
E ‘u fichitu bottìa forti forti;

non fannu athru chi gghiocar’e carti,
mi bussinu ch’i peri arret’e porti,
mi tagghinu, e mi tagghinu, ‘sti sarti,
non sannu si su’ vivi o si su’ morti!!!!

Penzinu sulamenti ‘a malasorti,
cianginu s’i castagni non su’ ‘nzerti,
cu’ ddeci figghi e vintiquatthru aborti
e sulu r’u…..Palluni, sunnu esperti;

i ciriveddhi sunnu curti curti,
ti veni mi t’i signi e po’ m’i scarti,
maravigghiati rinnu:”’I undi sciurti,
chi boli riri, ma chi esti l’arti”?

Ma po’ forhsi non hannu tutt’i torti,
l’arti non porta sordi ‘nt’e sacchetti,
si ha’ du’ liri ammenu ti cunorti,
athru chi arti, nci vonnu du’ spaghetti!!!

Eu sugnu fissa, chi campai ‘r’arti,
e l’athri sunnu ddhritti, non su’ storti,
campai sempri ‘i rrimasugghi e scarti,
su’ fissa e rrestu fissa, nfin’a morti!!!!!!!.....

(tratte da ‘sta’vita)